Gen 21 | BMU | STEP | Kembunöŋ Sara kalem möriam waŋgimamgö keuŋi jim jöhöi ahöyöhi, miaŋgö dop i ek galöm ak waŋgii malök. Keu jiyöhi, miaŋgö dop i kewö ak waŋgiyök:

a2Hib 11.11; 4 Jen 17.12, Apo 7.8

b10Gal 4.29-30; 12 Rom 9.7, Hib 11.18

d22Jen 26.26

Genesis 21

Aisak asuhuyök.

1 Kembunöŋ Sara kalem möriam waŋgimamgö keuŋi jim jöhöi ahöyöhi, miaŋgö dop i ek galöm ak waŋgii malök. Keu jiyöhi, miaŋgö dop i kewö ak waŋgiyök: 2 Saranöŋ gölöm aliga Abrahamnöŋ azi namŋi aiga töndup yaŋgö morö nahönŋi meyök. Anutunöŋ morö nahön asuhumapkö keuŋi qeljiŋe jim jöhöyöhaŋgö dop mi mönö nalö miaŋgöreŋök asuhuyök. 3 Saranöŋ Abrahamgö morö nahönŋi meiga qetŋi Aisak (gön kölja) qerök. 4 Qeriga Aisaknöŋ wehönŋi 8 aiga nalö miaŋgöreŋ Anutugö aiwesökŋi sileŋe yandiyök. Anutunöŋ keu jim kutui ahöyöhaŋgö dop mi yandiyök. 5 Abrahamnöŋ yambuŋi 100 aiga nahönŋi Aisak asuhuyök. 6 Asuhuiga Saranöŋ keu kewö jiyök: “Anutunöŋ gönkölköl miwikŋaim niŋgiyök. Miaŋgöra denike yeŋön nöŋgö kösohotni mötmei, yeŋön mönö nömbuk gön kölme.” 7 Mewö jiba toroqeba kewö jiyök: “Saranöŋ morö galömkölkölŋa akŋawi, daŋön keu mi qeljiŋe möta Abrahamgöra jibawak? Mewö qahöpmö, nalö kewöŋe yaŋön azi namŋi aiga nöŋön töndup yaŋgö nahönŋi meal. “Mewö. 8 Aisaknöŋ qariba juzu mosöriga wehön miaŋgöreŋök Abrahamnöŋ nene lömbuaŋ ketaŋi alök. ^a

Saranöŋ Hagar aka Ismael közöl etkiyök.

9 Ijipt ambi Hagarnöŋ Abrahamgö morö nahönŋi Ismael meyöhi, yaŋön nalö kunöŋ munŋi Aisak ilita mepaiköba gönawöt ak waŋgiiga Saranöŋ mi ehök.

10 Mewö eka Abrahamgöra kewö jiyök: “Welen ambigö nahönŋan mönö nöŋgö nahöni Aisakpuk göhöreŋ öröyuai mi qahö mendeŋda buŋa qem aŋgumahot. Welen ambi mi aka nahönŋi mi mönö közölnöŋga anmahot.” 11 Saranöŋ keu mi jiyöhi, miaŋön Abrahamgö uruŋi qeiga Ismael mi nahönŋi ahöhaŋgöra aka urueret möriga uruŋi mötökömbuk ahök.

12 Mewö ahiga Anutunöŋ yaŋgöra keu kewö jiyök: “Nahöngi aka welen ambigi Hagar yetköra mönö urugoro ketaŋi kude mötman. Aisakö gwölönarökurupŋi yeŋönök mönö göhö qetbuŋagi bisiba malme. Miaŋgöra Saranöŋ keu göhöra jizawi, mi pakpak mönö möta tem kölman. 13 Welen ambigahö nahönŋan göhö gwölönaröki akzawaŋgöra nöŋön i mewöŋanök ahumsehip waŋgibiga gwölönarökurupŋan könagesö ketaŋi akŋe.”

14 Mewö jii möta Abrahamnöŋ ahöba söŋan kötökŋe wahöta nene tosatŋi memba o uu (ou huhu) lama sileŋan memeŋi miaŋön o uba kaba Hagargö qamböŋe ala mindiŋgöba nahönŋambuk melaim etkiiga mosöta anohot. Anda Berseba gölme qararaŋkölkölŋe aŋgota liliköba malohot. 15 Malohotka lama sileŋe o memba anöhi, miaŋön qahöwahiga nahönŋi mi böŋbaŋ ip köhösöŋi kungö bapŋe ali ahöyök. 16 Ali ahöiga kinda kewö mötmöriyök: “Nahönan jeni qakŋe kömumawi, mi ekŋamgö osiba jemörön akzal. “Mewö mötmöriba pokom mulget anakzawaŋgö dop tikep anda tata silata sahöt gigilahöyök.

17 Morö sahöröhi, mi Anutunöŋ möriga garataŋan suepnöhök Hagargö qeta kewö jiyök: “Hagar, gi wani lömbötkö uruŋe maljan? Keŋgötki kude mötnöŋ. Morönöŋ endu ahöba sahötzawi, Anutunöŋ sahötŋi mi lök mötza. 18 Mönö wahöta morö nahöngi gölmenöhök kököbihinöŋ wahöriga böröŋe memba mökökölim waŋgiman. Nöŋön i könaŋgep ahumsehip waŋgibiga gwölönarökurupŋan sehiba könagesö ketaŋi qetbuŋaŋinambuk akŋe.” 19 Suep garatanöŋ mewö jiiga Anutunöŋ jeŋi metohoiga uba o lömŋi kun ehök. Mi eka lama sileŋi memba anda miaŋön o uba kaba nahönŋi waŋgiiga neyök. 20 Anutunöŋ Ismaelbuk kiniga qariba gölme qararaŋkölkölŋe mala erim nembi azia ahök. 21 Gölme qararaŋkölkölŋi qetŋi Paran miaŋgöreŋ maliga namŋan Ijipt kantrinöhök ambi kun memba anömŋa waŋgiyök. Mewö. ^b

Abraham aka Abimelek yetkön urujöhöjöhö ahot.

22 Nalö miaŋgöreŋ Abimelek aka yaŋgö yarö kambuŋaŋgö suahö galömŋi qetŋi Fikol yetkön Abrahamgöra kewö jiyohot: “Göŋön öröyuai pakpak aka memakzani, Anutunöŋ mönö miaŋgöreŋ göbuk kinakza. 23 Miaŋgöra göŋön mönö merak kiaŋgöreŋ Anutugö jeŋe jöjöpaŋ keu kewö jiba jim köhöiman: ‘Nöŋön gi, moröurupki aka gwölönarökurupki embuk isimkakalek kun kude aka malmam.’ Mewö jim köhöiba nöŋön ak kömum gihiba malali, miaŋgö dop göŋön mönö mewöŋanök gölme ki aka ni ak kömum netkiba malman. Gi gölme kiaŋgöreŋ kiana aka maljan.”

24 Mewö jiyohotka Abrahamnöŋ kewö jiyök: “Nöŋön jöjöpaŋ keu mi ölöp jiba jim köhöimam.”

25 Mewö jiyökmö, Abimelekö welenqeqeurupŋan o löm kun nanŋinaŋgöra aŋgön kölgeri, Abrahamnöŋ miaŋgöra Abimelek jim waŋgiyök. 26 Jim waŋgiyökmö, Abimeleknöŋ kewö meleŋda jiyök: “Daŋön silik mi ahöhi, mi nöŋön qahö mötzal. Nangak miaŋgö keuŋi kun mutuk qahö jinöŋ möta mala merak-kun keu mi mötzal.”

27 Mewö meleŋda jiiga Abrahamnöŋ anda lama aka bulmakau memba kaba Abimelek waŋgiiga nalö miaŋgöreŋök sutŋire jöhöjöhö aka alohot. 28 Mi ala Abrahamnöŋ lama kambuŋineyöhök lama ambiŋi moröŋi 7 meköm eŋgiba al eŋgii nanŋinök kinget.

29 Mewö kingetka Abimeleknöŋ Abraham kewö qesim waŋgiyök: “Lama ambiŋi moröŋi 7 kewöta endu al eŋginöŋga nanŋinök kinjei, mi könaŋi wuanöŋgöra?”

30 Qesim waŋgiiga kewö meleŋnök: “Nöŋön o lömŋi ki esiali, keu mi jibiga mi möt narizan ewö, lama moröŋi 7 ki mönö nöŋgö böröneyök buŋa qem aŋgunöŋga nöŋgö keunaŋgö dangunuŋi akŋa.” 31 Mewö meleŋda azi yahöt mi gölme miaŋgöreŋ kinda jöjöpaŋ keuŋiri jiba jim jöhöm aŋguyohot. Miaŋgöra miri miaŋgö qetŋi Berseba qerakze. ^{▼▼Berseba keu miaŋgö könaŋi yahöt: sewengö o lömŋi aka jöjöpaŋ keugö o lömŋi.}

32 Berseba mire jöhöjöhö mewö ahot teköiga Abimelek aka yaŋgö yarö kambuŋaŋgö suahö galömŋi Fikol yetkön wahöta liliŋgöba Filistin yeŋgö gölmenöŋ anohot. 33 Anohotka Abrahamnöŋ berem ip kun Berseba miri miaŋgöreŋ kömöta Kembu Anutu bem koŋkoŋ yaŋgö qetŋi qeta köuluköyök. 34 Köuluköba kinda Filistin yeŋgö gölmenöŋ nalö köröpŋi kiana aka malök. Mewö. ^d